حكاية العفريت والجن

مقالة اليوم عبارة عن موقف أو عدة مواقف تواجه الجميع في حياتهم فاليوم نتحدث عن حكاوي الجن و العفاريت وخصوصاً في مصر لأجل هذا السبب اخترت أن تكون المقالة بالعامية المصرية الحبيبة "

الشعب المصري يموت فى حاجه اسمها العفاريت وقعدة الحكاوي عن العفاريت
والجن .. ولو عاوز تجرب اقعد كده مع أى مجموعة من الناس واحكلهم حكاية عن
العفريت اللى طلع لفلانه أو العفريت اللى ساكن فى العمارة الفلانية ومش
مخلى حد عارف يسكن فيها ..أو الشقة اللى الاثاث بيترمي منها من الشبابيك
..حتلاقى الناس تندمج معاك وحتلاقى برده كل واحد منهم عنده من هذا النوع
حكاية واتنين وعشرة ...والعجيب أن اى حاجه غريبة أو غير مفهومة أو الغموض
محيط بيها تلاقى الناس تفكر على طول فى تفسير معفرت ..حتى أنت بص لنفسك
كده لو لاقيت مثلا حاجه فى البيت بتتهز وانت قاعد لوحدك بالليل أو سمعت
صوت غريب وانت لوحدك بالليل فى البيت عقلك على طول حيتجه نحو العفاريت
وياترى مين العفريت اللى فاضي وجاي يقلق منامك بالليل ! ..حتى متعبتش نفسك
وتفكرفى ايجاد سبب علمي أو منطقى للى حصل .. أفتكر مرة كنت قاعد بالليل
أمام الكمبيوتر وكان جنبى على المكتب كوباية نسكافية وبعدين وأنا شغال
أكتب مقال زى ده كده لاقيت الكوباية بتتهز ..طبعا فكرت زى كل الناس وقولت
(أعوذ بالله من الشيطان الرجيم ) ..بعدين قولت فى نفسي (يخرب عقلك يا
عفريت ) .. وبعدين مين العفريت الرايق اللى عاوز يشتغلنى ويهزلى الكوباية
! ..

وطبعا
لما تدبرت الامر اتضح ان كان فيه عربية ( لوري) كانت تسير فى الشارع وهزت
العمارة وانا لما كنت مستغرق فى الكتابة محستش بيها .. وطلعتلى من الذاكرة
شوية حاجات كانت بتحصل زمان .. منها مثلا ان كان منتشر اوى حكاية (الزار)
، فكانت أى واحدة مثلا إتأخر عليها الخلفة شوية أو تعبانة نفسيا أو جوزها
حاله مش ولابد شويتين تروح تعمل له زار ..والزار ده يا جماعة عبارة عن
حفلات مسخرة تضرب فيها الطبول وتتعرى فيها النساء وممكن يصل الامر فيها
إلى حد إنتهاك الأعراض .. وطبعا المصيبة اللى فوق ده وده هو الشرك بالله
عز وجل والذبح للجن ، وطبعا الذبح لغير الله سواء كان لإنس او جن بغرض
قضاء الحاجات شرك ..فقضية الذبح دى خطيرة وهى من اعظم العبادات اللى شرعها
الله سبحانه وتعالى وجاءت ايات القرأن المعظم تستنكر على المشركين اللى
كانوا بيذبحوا للاصنام .. وخطورة الامر ده كمان منتشرعند الناس بتوع زيارة
الاضرحة اللى بيذبحوا للولى الفلاني أو العلاني .. وكل ده مخالف للعقيدة
الاسلامية اللى للاسف أغلب الناس فى غفلة عنها ...

واحدة صديقتي بمناسبة حكاوى المصاطب بتاعة العفاريت
قالتلى ححكيلك حكاية غريبة اوى ، قولتها احكى يا ستى ، قالتلى جدى مرة كان
عائد من الشغل بالليل اوى وزمان بالليل مكنش زى دلوقت ، زمان بالليل مكنتش
تسمع صوت صريخ ابن يومين ..قولتلها ها وبعدين طلعله حرامي ؟ّ! قالتلى لا
..قولتلها عسكرى الدرك مسكه مثلا ؟ قالتلى ياريت ..قولتلها أمال ايه بأه
؟! ..قالتلى طلعله عفريت !! .. طبعا سمعت الكلمة دى وهاتك يا ضحك حوالى
خمس دقائق وأنا مش عارف أمسك نفسي من الضحك ، وصديقتي تقولى والغريب انه
لما يقرب منه يلاقيه بيطول ..بيطول ..بيطول ، قولتلها يا بنتى تلاقيه كان
بيحلم وافتكر ان ده حقيقى ، بجد يا جماعة أنت لو فتحت موضوع العفاريت ده فى اى قعدة حتسمع العجب من الشعب المصري ، وللاسف الناس واخدة ثقافتها عن الجن والعفاريت من الكتب الصفراء الموجودة على الأرصفة ، وطبعا كلام زى ده المفروض يتاخد من مصادرة الموثقة الكتاب والسنة .

وبعدين
بأه تعرف الكداب منين؟ تلاقيه بيقولك أنا شفت عفريت .. طب العفريت ده شكله
ايه بأه ..يقولك ليه قرنين وشكله كذا وقفاه كذا ..الخ ، وطبعا ده كلام
مصادم للكتاب والسنة ، شوف مثلا القرأن الكريم بيقول ايه فى سورة الاعراف
{يَا بَنِي آدَمَ لاَ يَفْتِنَنَّكُمُ الشَّيْطَانُ كَمَا أَخْرَجَ
أَبَوَيْكُم مِّنَ الْجَنَّةِ يَنزِعُ عَنْهُمَا لِبَاسَهُمَا
لِيُرِيَهُمَا سَوْءَاتِهِمَا إِنَّهُ يَرَاكُمْ هُوَ وَقَبِيلُهُ مِنْ
حَيْثُ لاَ تَرَوْنَهُمْ إِنَّا جَعَلْنَا الشَّيَاطِينَ أَوْلِيَاء
لِلَّذِينَ لاَ يُؤْمِنُونَ }الأعراف27 لاحظ قوله تعالى ( إِنَّهُ
يَرَاكُمْ هُوَ وَقَبِيلُهُ مِنْ حَيْثُ لاَ تَرَوْنَهُمْ ) فإستحالة إن
الانسان يرى شيطان فى صورته الحقيقية ، لكن ممكن ترى شيطان فى صورة كلب أو
إنسان أى صورة أخرى غير صورته الحقيقية ..وفى الحالة دى لو قتلته حيموت
لانه بياخد طبيعة الصورة المتنكر فيها علشان كده الشياطين- لعنهم الله-
بيخافوا من التنكر فى الصور المختلفة لفترة طويلة .. وبعدين لو بصيت على
أغلب الحكاوي تلاقى المسألة اشتغالات يعنى العفريت اللى طلع وبيطول ويطول
ده على رواية صديقتي ، هل هو متنكر مخصوص علشان يشتغل الراجل ده ! طبعا
كلام يفتقر حتى للمنطق .. مسألة (الجن والشياطين) عاوزه دراسة فعلا جادة
قائمة على الكتاب والسنة وللأسف مثل هذه الدراسات نادرة وأغلب الكتب
المتوفرة دلوقت فيها من المبالغات الكتير والخرافات الاكتر ..

وللاسف
فى ظل ثقافة الجهل المسيطرة على عقول شعبنا وعدم القراءة الدينية سهل اوى
إن اى خزعبلات او غيرها انها تسيطر على عقولهم.. من ثلاثة ايام سمعت واحد
فى الشارع لا اعرفه ينصح صديقه بتعليق خرزة زرقاء فى بيته .. بالله عليكم
ده كلام يتقبله عقل سليم ! يعنى خرزة زرقاء حتعملك ايه ! حتحميك من الجن
ولا حتحميك من الحسد ! ده فضلا على ان الكلام ده شرك زى ما قولنا ... لان
الحماية والمدد لا تطلب إلا من الله تبارك وتعالى ، وتلاقى واحدة ولا واحد
لما يكلمك عن الجن
يقولك (اشتاتا اشتوت) ايه اشتاتا اشتوت دى! . فين الاستعاذة بالله سبحانه
وتعالى وطلب الحماية منه! ، شوف ربنا سبحانه وتعالى بيقول {وَقُل رَّبِّ
أَعُوذُ بِكَ مِنْ هَمَزَاتِ الشَّيَاطِينِ }المؤمنون97 ، هو ده العلاج
والحماية لا خرزة صفراء ولا زرقة ولا اى خزعبلات من هذا النوع ، ولذلك يا
جماعة أهم شىء واهم إستفادة انا عاوز أوصلها من خلال هذا الموضوع ،

معرفة
ديننا معرفة جيدة وقراءة العقيدة الاسلامية لناس موثوق فى علمهم وفضلهم
وده اللى بنصح به على طول ولما سألتنى عضوه هنا فى المنتدى ازاى تكون
مثقفة قولتلها قبل كل شىء لازم القراءة فى العقيدة الاسلامية ، قبل
السياسية وقبل التاريخ وقبل اى حاجه لازم تكون على إطلاع جيد على العقيدة
الاسلامية ،

دة
الموضوع باختصار شديد جداً و أتمنى أنه الكلام دة يوصل للناس كلها لأنه
فعلاً موضوع مهم و حيوي يا جماعة و مش لازم نسيب نفسنا لشوية خزعبلات و
شوية دجالين عمالين يدعو الروحانيات و السحر و العلوم و الفنون و الحركات
و هما ولا فاهمين أي حاجة في أي حاجة علشان بس يكسبو من الناس التعبانين
شوية فلوس و دايما الناس دول بيلعبوا على أحلام الناس و مشاعرهم . اللي
عاوزة جوزها يصالحها و اللى عاوز مراته ترضى عليه و اللي عاوز يتعالج من
مس أرضي قديم وهمه واحد انه بيعاني منه و اللي و اللي . ياااه لو فضلنا
نعد و نقول مش هنخلص .

و اشتاتاً أشتوت عبارة عن كلمات متوارثة لدى العامة من الشعب المصري بس محدش يعرف معناها و لا بتعمل ايه غير انها ارضاء للأسياد اللى هما الجن و العفاريت
طبعاً و الكلمات دي بتشبه لحد كبير برضة كلمة دستور يا أسيادي أو دستور يا
اسيادنا اللى اتكلمنا عنها في مقالة قبل كدة و برضة بالعامية المصرية اللى
بعشقها رغم حرماني منها بسبب كتابتي ليكم بالفصحى و اللى برضة بحبها جداً
و بعشقها هي كمان .

على أي
حال أنا كنت مبسوط جداً و انا بتكتب ليكم الموضوع دة لاني اعتقد انه يهم
ناس كتير و ان شاء الله اشوف تفاعلكم مع الموضوع و يكون قوي بقدر أهمية و
سخونة المسألة .

و بالمصرية العامية برضة اختمها و اقولكم جميعاً

اتمسوا بالخير

منقووووووول

» حكاية حصالة