متخيلاك كده

اجدد خواطر للمبدعة سمية كمال الدين
خاطرة جميلة و رائعة جدا
كالعادة كلمات بسيطة بس قوية جدا


لما ببقى معاك ببقى عاوزة احكى كتير مش عشان بحب الرغى واللوك لوك الكتير ولا عشان عاوزة حد اتكلم معاه بس عشان بحب اشوف اهتمامك بيا وانت بتسمعنى وبتسمع حكاويا وعملت ايه ورحت فين وشفت مين و قلت ايه والحاجات اللى عجبتنى فتعرف حاجات اكتر عنى وعن ذوقى ع الاقل عشان لما تزعلنى تعرف تصالحنى وتضحكنى ازاى وبحب الحكاوى عشان حاجة تانى بحب اشوفك منفعل وبتزعق لى ومتضايق منى لو قلت لك على حد ضايقنى او عملى حاجة ومش كلمتك وقتها عشان تتصرف معاه وميضايقنش كده تانى وعشان كمان تهدينى شوية بدل ما افضل طول اليوم متضايقة





بتحب الحاجات اللى انا بحبها مش عشان هى حلوة وتحفة وان انا ذوقى رائع وحتى لو كان كده بس انت بتحبها عشان انا بحبها وعشان هى لايقة عليا وانا برده بحب حاجاتك مهما كانت واهتماماتك وهواياتك حتى لو كانت مناقضة ليا وطباعك وشخصيتك وكل حاجة فيك بحبها بس عشان هى بتاعتك





حد كويس وقوى ويعتمد عليه شهم وليك مواقف جدعنة مع كل الناس اللى تعرفهم واللى مش تعرفهم كمان وده بيخلينى اغير عليك من ان الناس تحبك اكتر منى وخصوصا لو فيهم بنات ببقى هتحنن عليك وعشان انت كويس فى عينى عاوزاك تكون كويس فى الحقيقة وفى عيون كل الناس





فى الشكل مش متخيلاك قد ما نفسى تكون طويل وعريض عشان لما تاخدنى فى حضنك وتضمنى ليك احس بالاحتواء والامان وانا جوا حضنك وابقى مش خايفة عشان متاكدة ان مفيش حاجة ممكن تاذينى وانا معاك عشان انت اصلا مش هتسمح لحاجة تقرب منى مهما كانت او حتى مهما كان مين





اما نخلف حتى لو دستة مع انى مستحيل هخلف العدد ده اصلا بس متاكده انك هتكون اب كويس وطيب وهتعرف تقرب منهم وتصاحبهم ونكون اسرة فيها ترابط كل واحد فيها بيحب التانى وبيخاف عليه وبيحترمه برده جو كله راحة وامان وحب وثقة ورضا





بعد خمس ولا ست سنين من الجواز والحياة اللى يمكن تكون بعدتنا عن بعص والحب اللى بطبيعته بيقل بعد الجواز متوقعة فى يوم تفاجئنى وتثبت لى ان انا لسة فى قلبك زى الاول واكتر و ان مهما عدينا ع مشاكل ومواقف والوقت مر هفضل فى قلبك زى مانت جوا قلبى ويمكن اكتر