بحبك وازاى اقولك

خاطرة عجبتنى أوى من خواطر المبدعة سمية كمال الدين
بجد كلام ملهوش حل كلام رائع جدا

بحبك و ازاى اقولك

تعرف ان انا مش متضايقة بسبب المشاكل ولا بسبب المواقف الصعبة اللى مريت بيها والناس السيئة والكدابة اللى عرفتها ولا بسبب بكرة اللى مش عارفة هيكون عامل ازاى بعد ما امبارح اتشوه وانهارده ملامحه تاهت وسط الزحمة واللاخبطة ولا بسبب المجتمع اللى مبقتش عارفة اتعامل معاه ازاى وانا مختلفة معاه فى كل حاجة ولا بسبب الحاجات اللى راحت منى والناس اللى خسرتها ولا بسبب اى حاجة ...... انا متضايقة عشان مش قادرة اقولك انى محتجاك جنبى تطبطب عليا تطمنى وتاخدنى فى حضنك تحمينى من اى حاجة وتدافع عنى لو كنت صح ولو كنت غلط تقف معايا لغاية ما اوصل للصح واعرف اكمل طريقى ........ متضايقة عشان مش من حقى اقولك ايوة بحبك انت مش حد تانى ايوة مش عاوزة غيرك اكمل حياتى معاه ايوة عاوزة ابقى حبيبتك فى عشقك ليا وبنتك فى اهتمامك بيا وصحبتك فى قربك منى وابقى الهوا اللى بتتنفسه والشمس اللى بتدفيك فى الشتا والقمر اللى بينور ليلك والبير اللى تخبى فيه اسرارك وابقى كل حاجة فى حياتك زى ما انت كل حاجة فى حياتى ....... متضايقة عشان مفروض ابعد عنك الى ما لانهاية لغاية ما يبقى فى صفة تقربنى منك برغم انى مش عايزة غيرك معايا .......متضايقة عشان لما بمر بموقف صعب او ببقى فى حالة نفسية مش كويسة ببقى عايزة اشوفك او حتى لما ببقى مش عارفة اتصرف و اخد قرار او معايا حاجة مهمة او امتحان ببقى عايزة اكلمك واسمع صوتك عشان تطمنى وتهدينى وتقولى متخافيش بس فى كل مرة مش بينفع اعمل كده ....... متضايقة عشان الكلام ده مش عارفة لو مفروض اقوله ولا لا حتى وان كنت فى كل الاحوال مش هقدر اقولهالك انت او اقولك على الاقل انه الكلام ده ليك انت لكن هكتبه كلام عام

اكدب عليك لو قلت ان مش خايفة فى يوم اكتشف انى كنت غلط فى اختيارى لما ابص فى عينيك والاقى انك طلعت متستاهلش ...... اكدب عليك لو قلت انى محبتكش بجد برغم انى مش كنت مقتنعة بفكرة الحب من غير جواز وعلاقة واضحة صريحة وعشان كده ببعد عنك برغم انى محتجالك اكتر من اى وقت تانى ...... اكدب عليك لو قلت ان انا ممكن انساك بعد ما عرفتك وكل حاجة جوايا ارتبطت بيك ....... اكدب عليك لو قلت انى مستعدة اضحى بكل حاجة عشانك واتحدى الظروف عشان اكون معاك لو كان ده على حساب نفسى وهيخلينى اغلط واعمل حاجة انا مش مقتنعة بيها

هو انا فى عيد ميلادك ممكن اجيبلك هدية حتى لو مش هينفع اديهالك ...... ممكن وقت اما احتاجك اكلمك ع طول من غير ما افكر مليون مرة وانا عارفة انى فى النهاية برده مش هتصل ...... ممكن كل صبح اقولك صباح الخير وتكون اول حد عينى تشوفه اول ما اصحى ...... ممكن نتخانق ونزعق وفى الاخر كل واحد يرجع يصالح التانى حتى لو مش هو اللى غلطان ببساطة عشان محدش فينا هيستحمل يشوف التانى زعلان وبالذات لو كان هو السبب ....... ممكن تكون بطل احلامى وهى فى خيالى وكمان لما تتحقق ولا هى مش هتحقق اصلا

بس تعرف فى حاجة كمان وهى ان برغم كل حاجة هفضل احبك ...... وهفضل احتاجك ....... وهفضل استناك ....... وهفضل ادعى ربنا بينى وبين نفسى يجمعنا ....... وهفضل احاول اكون حد يستاهل حبك عشان انت كبير اوى فى عينى وتستاهل كل خير وكل حاجة كويسة حتى لو كان ملناش نصيب مع بعض ....... و هفضل اخلى بالى على نفسى عشانك قبل عشانى ....... و هفضل اكتب لك واكتب عنك واكتب و انا زعلانة منك و وانا

فرحانة و لما نبعد واما نقرب و وقت ما اخاف منك وعليك و وقت ما اطمن عليا وعليك

STar In The Sky : Somaya Kamal Eldin

جميـــــــــــــــــــله كالعاده ياسميه
بس قوليلى مين هو بس علشان اعرف اشكره انه بيخليكى تطلعى الكلام دا؟
شكرا يا اسماء ياقمر على النقل المميز

» بحبك ياحمااار