مصر هي أمي
نيلها هو دمي شمسها في سماري
مش عارف إيه كده في ملامحي
حتي لوني قمحي لون خيرك يا مصر
يا صباح الوطنيه
عاش والله اللي كتب الكلمتين دول
منتهي الإندماج بين المواطن المصري ومصر
مصر أمي والنيل دمي وشكلي ولوني وكل حاجه مختلطه بمصر
بس إشمعني مصر
ما أرض الله واسعه وكلها برده أرض الله
ليه بقا مصر بالذات
ليه حتي لو ربنا سهللنا ولقينا نفسنا في حته تانيه من أرض الله الواسعه
بنحس بحنين لمصر
وتبقي في إيدينا كل حاجه
وعينينا تتملي من كل حاجه
وقلبنا يفضل فاضي
....................
وتلاقي المصري علي قهوه في إسطنبول
أو في جنينه في لندن
أو تحت شمسيه في مطعم طلاني فوق الجبل
والدنيا من حواليه نضافه وزوق ولطافه
وتلاقيه برده بيقول
بس مصر وحشتني
..........................
لو كان الوطن مجرد مكان ناكل ونشرب فيه ونتناسل عليه
(نتجوز ونخلف ونجيب عيال يعني)
كان يبقي أي مكان في الدنيا
أحسن من مصر
لأن نص دول الكره الأرضيه
عالأقل أكلها وشربها وستاتها ورجالتها كمان
أحلي من مصر
يبقي مش المنفعه بس
أكيد في سر تاني ؟
...........................................
تركيا هي أمي
وأي نهر من الـ 40 نهر اللي موجودين فيها هو دمي
وشمسها في سماري ومش عارف إيه برده في ملامحي
حتي لوني قمحي
لون خيرك يا تركيا
( أه ماهي تركيا بتزرع القمح فعلاً مش بتستورده )
بس مش ماشيه برده
في حاجه ناقصه
مصر بنت الكلب اللي في قلبي دي
أعمل فيها إيه؟
...................................
حتة الصحرا اللي واقعه في ملطش واللي رايح واللي جاي بيحتلها
واللي الفرص فيها بالقطاره
والقطاره مش في إيدينا كمان
واللي بقت عامله زي مقاولة الهدد
كل عيل ماسكلة قالب طوب وبيجري
وحتي الشعب اللي لونه قمحي واللي كان مالي الدنيا ضحك
بقا دمه تقيل
ليه بقا حاززه في نفسي كده
ليه مش عارف أستئصل نفسي منها أو أستئصلها من نفسي
...............................
مراية الحب عاميه
أيوه عاميه و بنت كلب كمان
ماهو حبيبتك مش ممكن تكون أحلي واحده في الدنيا
الواحد مننا بيحب قرده وبيتهيأله إنها لو غابت عن عينه
يروح فيها
والدنيا كلها وإصحابه وأهله
يبقوا شايفين إنها صندل
ماعدا هو
يبقي شايفها ملاك نازل من السما
وخساره في اي حد يبص علي جمالها
................................
ويمكن تكون هي دي المشكله
إننا بنحب مصر وبنتلطش في غرامها
قبل ما نعرف إن في بلد تانيه إسمها تركيا
بنحب القهاوي بتاعتها قبل ما نسمع عن قهاوي باريس
وبنحب ترابها قبل ما نعرف إن في بلاد تانيه نضيفه
ومفيش فيها تراب أصلاً
وبنتدهول في غرام المطاعم بتاعتنا وآخر ساعه وكوك دور
قبل ما نعرف إن مطاعم إيطاليا فيها أكل بني آدمين
وإن الفول والطعميه والمسقعه دي أصلاً
علف
وبنعشق هواها قبل ما حد يقولنا إننا عايشين في منطقه من أكبر مناطق التلوث في العالم كله
وبنحب بنت الجيران أو زميلتنا في الجامعه
قبل ما نفوق عالحقيقه المره
إن نسبة الذكور في مصر
100%
..........................
قال والناس فاكره إن حب الوطن حسابات بتحصل في العقل بس
أتاريه طلع غرام في غرام
كل اللي أنا عايز أقوله
إن لما بتيجي سيرة مصر في الكلام
جسمي بيقشعر
وشعر إيدي بيقف
وبحس إن دمي إتحرك
يا سلام يا ولاد
د حب مصر
طلعت فيه هرمونات
أكتر من هرمونات البلوغ والمراهقه والحب الأول
وكل يوم بحبك أكتر من اللي فات
مش عقل ولا مصالح .. دي بس هرمونات
..................
موضوع: .^. بــتــحبــ مــصــر لــيــهــ .^. ! 
